பாபர் அசாம் தலைமையிலான பாகிஸ்தான் அணி அடுத்த மாதம் இலங்கைக்கு வருகை!

0
17

அடுத்த மாதம் இலங்கைக்கு சுற்றுப்பயணம் மேற்கொள்ளவுள்ள பாபர் அசாம் தலைமையிலான பாகிஸ்தான் கிரிக்கெட் அணி, ஐ.சி.சி. இன் உலக டெஸ்ட் சம்பியன்ஷிப்பிற்காக இலங்கை அணியுடன் இரண்டு போட்டிகள் கொண்ட டெஸ்ட் தொடரில் களமிறங்கவுள்ளது.

இதன்படி டெஸ்ட் தொடரில் பங்கேற்கவுள்ள பாகிஸ்தான் டெஸ்ட் குழாம் தற்போது அறிவிக்கப்பட்டிருக்கின்றது. டெஸ்ட் குழாத்தில் தனது உடற்தகுதியினை நிரூபித்திருக்கும் சுழல் பந்துவீச்சாளரான யாசிர் சாஹ் இணைக்கப்பட்டுள்ளார்.கடந்த 2021ஆம் ஆண்டில் கடைசியாக பாகிஸ்தான் அணிக்காக டெஸ்ட் போட்டியொன்றில் பங்கேற்ற 36 வயது நிரம்பிய யாசிர் சாஹ், உள்ளூர் T20 தொடர் ஒன்றில் விளையாடிய போது ஏற்பட்ட விரல் உபாதை காரணமாக நீண்ட காலம் தேசிய அணியில் இல்லாது போயிருந்தார்.

இந் நிலையில் யாசிர் சாஹ்வின் மீள்வருகை இலங்கை சுற்றுப்பயணத்தின் போது பாகிஸ்தானின் டெஸ்ட் குழாத்திற்கு பலமாக அமையும் என எதிர்பார்க்கப்படுகின்றது. கடைசியாக 2015ஆம் ஆண்டில் பாகிஸ்தான் இலங்கைக்கு டெஸ்ட் சுற்றுப்பயணம் மேற்கொண்ட போது நடைபெற்ற போட்டிகளில் யாசிர் சாஹ் 19.33 என்கிற பந்துவீச்சு சராசரியுடன் மொத்தமாக 24 விக்கெட்டுக்களைக் கைப்பற்றியிருந்தமை குறிப்பிடத்தக்கது.

மறுமுனையில் அவுஸ்திரேலிய தொடரில் இருந்து காயம் காரணமாக விலகிய சுழல் பந்துவீச்சு சகலதுறைவீரர் மொஹமட் நவாஸ் மற்றும் அறிமுக சுழல்பந்துவீச்சு சகலதுறைவீரர் சல்மான் அலி சகா ஆகியோருக்கும் பாகிஸ்தான் குழாத்தில் வாய்ப்பு வழங்கப்பட்டிருக்கின்றது.சல்மான் அலி அகா பாகிஸ்தானின் உள்ளூர் போட்டிகளில் கடந்த மூன்று பருவங்களிலும் சிறப்பான ஆட்டத்தினை வெளிப்படுத்தியிருந்தமைக்காக அவருக்கு தேசிய அணியில் வாய்ப்பு வழங்கப்பட்டதாக பாகிஸ்தானின் சிரேஷ்ட தேர்வுக்குழு உறுப்பினர் மொஹமட் வஸீம் தெரிவித்துள்ளார்.

இதேநேரம், அவுஸ்திரேலிய டெஸ்ட் தொடரில் விளையாடியிருந்த சுழல்பந்துவீச்சாளர் சஜித் கானிற்கு இலங்கை சுற்றுப்பயணத்தில் வாய்ப்பு மறுக்கப்பட்டுள்ளது.பாகிஸ்தான் டெஸ்ட் அணியானது இம் மாதம் 25ஆம் திகதி தொடக்கம் இலங்கை சுற்றுப்பயணத்திற்கான பயிற்சிகளை இஸ்லாமாபாத் நகரில் ஆரம்பிக்கவிருப்பதோடு, ஜூலை மாதம் 06ஆம் இலங்கைக்கு வரவுள்ளதாக தெரிவிக்கப்பட்டுள்ளது.

தொடர்ந்து இரு அணிகளுக்குமிடையிலான முதல் டெஸ்ட் போட்டி ஜூலை மாதம் 16ஆம் திகதி காலி நகரிலும், இரண்டாவது டெஸ்ட் போட்டி ஜூலை மாதம் 24ஆம் திகதி கொழும்பிலும் நடைபெறவிருக்கின்றமை குறிப்பிடத்தக்கது.

LEAVE A REPLY

Please enter your comment!
Please enter your name here